არქივი

შაბათს, 26 აპრილს თბილისის შერიგების ეკლესიაში სელეს VII. სინოდის მე-5-ე სხდომა გაიმართა, რომელსაც ესწრებოდა სინოდის 19 წევრი და 8 სტუმარი ბაქოდან, ბოლნისიდან, ბორჯომიდან, რუსთავიდან და თბილისიდან. სამწუხაროდ, გარდაბნიდან ჩამოსვლა საპატიო მიზეზით ვერ შეძლეს. ფორმალობების შემდეგ ეპისკოპოსმა ბარაისმა ანგარიში წარმოადგინა, რომელშიც ისაუბრა საეკლესიო წელს მომხდარ უმნიშვნელოვანეს მოვლენებზე და ასევე დიაკონური სამსახურის რესტრუქტურიზაციის გეგმებზე, რომელიც მის ყველა ნაწილს შეეხება: სასადილოს, საკვები პროდუქტების პროგრამას და სამედიცინო პერსონალს. ეპისკოპოსმა აღნიშნა, რომ მნიშვნელოვანია კონცენტრირება იმ სფეროებზე, რომლებსაც სახელმწიფო სუსტად ან თითქმის არ უჭერს მხარს, როგორიცაა დასაქმების თერაპია ფსიქიური ტრამვის მქონე ადამიანებისთვის ან მუსიკის თერაპია შშმ ბავშვებისთვის. შენობის განახლება და რემონტი ხორციელდება არა მხოლოდ თბილისის შერიგების ეკლესიაში, არამედ დუშეთშიც, სადაც იგეგმება სემინარები და ახალგაზრდული საზაფხულო ბანაკები, ასევე ყვარელში – ტურისტული ჯგუფების მისაღებად მიმზიდველ ადგილას. წელს სომხეთში დამოუკიდებელი დიაკონური სამსახური დარეგისტრირდა. ეპისკოპოსის ანგარიშს მწვავე დისკუსია მოჰყვა. 

სელეს ხაზინადარმა ნატალია კაიზერმა ეკლესიის ბუღალტერთან ტიმა არეშევასთან ერთად 2024 წელს ეკლესიის და სათემოების საქმიანობის ფინანსური ანგარიში წარმოადგინა და ბიუჯეტის ზოგიერთ პუნქტში გადახარჯვაზე და თბილისის სამრევლოს მიერ თვითდაფინანსების კუთხით კონცერტებითა და ეკლესიის დარბაზის გაქირავებით მიღწეულ წარმატებაზე გაამახვილა ყურადღება. ბოლოს ევანგელიურ-ლუთერული დიაკონური საზოგადოების 2024 წლის ფინანსური ანგარიში წარმოადგინეს დიაკონიის სოციალური სამსახურის ხელმძღვანელმა მაია გოცაძემ და შინ მოვლის სამსახურის ხელმძღვანელმა მადონა ურკევიჩმა. 

მწვავე დისკუსია გამოიწვია ეპისკოპოს როლფ ბარაისის გამოსვლამ საკვები პროდუქტების ყოველთვიური დარიგების აქციის თემაზე გერმანიიდან შემცირებული დაფინანსების გამო. 25 წელია, გერმანიაში გროვდება შემოწირულობები უპოვარი ადამიანებისთვის, თუმცა მას შემდეგ შეიცვალა როგორც გერმანიის, ისე საქართველოს ფინანსური მდგომარეობა. დახმარება იმ ადამიანებმა უნდა მიიღონ, ვისაც ნამდვილად სჭირდება ის. სინამდვილეში ასეთია პროდუქტების მიმღებთა 5-10 %, დანარჩენებისთვის კი ეს პროგრამა უბრალოდ კომფორტულია: ისინი ეკლესიისგან ყოველთვიურად საჩუქრად იღებენ პროდუქტებს და ამგვარად საყიდლებზე საკუთარ სახსრებს ზოგავენ. სამრევლოს თავმჯდომარეებმა აღიარეს, რომ საკვები პროდუქტების პროგრამა ადამიანებს იზიდავს და მათთვის მრევლში ყოფნის მოტივაციას წარმოადგენს. რა თქმა უნდა, აღნიშნა ეპისკოპოსმა ბარაისმა, ეკლესიას უნდა ჰქონდეს დიაკონური მუშაობა, ეს მომავალშიც ასე იქნება, ეკლესიაში მოყვასს უნდა ეხმარებოდნენ სიტყვითა და საქმით. თუმცა ეკლესია შეცდომაში არ უნდა შევიდეს და გამოყენების ინსტრუმენტად არ უნდა გადაიქცეს. გარდა ამისა, ჩვენ ანგარიშვალდებული ვართ ჩვენს შემომწირველებთან გერმანიაში, რომ მიღებული თანხები მიზნობრივად დაიხარჯება. ხანგრძლივი განხილვის შემდეგ სინოდის წევრები მივიდნენ დასკვნამდე, რომ საჭიროა კომისიის შექმნა პროდუქტების შეკვრის მიმღებთა “გაჭირვებულობის დონის” დასადგენად. კარგი იქნებოდა, თითოეული ადამიანი თავის თავს ეკითხებოდეს, რისი გაკეთება შეუძლია მას ეკლესიისთვის და როგორ შეუძლია მადლიერება გამოიჩინოს ეკლესიისადმი, რომელმაც ამდენი სიკეთე გაუკეთა – გამუდმებით დახმარების თხოვნის თუ მოთხოვნის ნაცვლად. 

ეპისკოპოსმა ბარაისმა გულითადი მადლობა გადაუხადა სარევიზიო კომისიას მრავაწლიანი ნაყოფიერი მუშაობისთვის და სთხოვა, იფიქრონ საკუთარი გამოცდილების სხვებისთვის გადაცემაზე და საქმის ღირსეული გამგრძელებლების აღზრდაზე. 2025 წლის საზაფხულო ბანაკების მოსამზადებელი კომიტეტის საქმიანობის ანაგრიში კომიტეტის თავმჯდომარემ ანტონ ჩახლოუმ წარმოადგინა. 

სინოდის განსაკუთრებით ამაღელვებელი მომენტი იყო დამშვიდობება პასტორ გოტჰარდ ლემკესთან, რომელიც შვიდი წელი ერთგულად ემსახურებოდა ბაქოს მაცხოვრის სამრევლოს და რომელიც ზაფხულში წყვეტს მუშაობას. მას ეპისკოპოსმა ბარაისმა ეკლესიის სახელით მადლობა უთხრა და სამახსოვრო საჩუქარი გადასცა. 

ბოლოს ეპისკოპოსმა ბარაისმა მადლობა უთხრა სინოდის ყველა წევრს და სტუმარს ნაყოფიერი ერთობლივი მუშაობისთვის და უსურვა მათ ღვთის კურთხევა ეკლესიის სასიკეთოდ მუშაობისას.
 

აღდგომა ყველა ქრისტიანისთვის გამორჩეული და განსაკუთრებული დღეა. ჩვენს ეკლესიაში ის მუდამ საზეიმოდ აღინიშნება. ამჯერადაც მრევლის წევრებმა ტრადიციულად იზეიმეს იესო ქრისტეს აღდგომა. ყველა სამრევლოში ჩატარდა ღვთისმსახურებები, სადაც მრევლის წევრებმა და სტუმრებმა ერთად შეასრულეს ჰიმნები და უფლის ლოცვები. ტრადიციულად ეს დღესასწაული თბილისის და რუსთავის მრევლის წევრებს რელიგიის საკითხების სახელმწიფო სააგენტოს წარმომადგენლებმა მიულოცეს.
ბავშვებმა სამრევლოებიდანაც მოამზადეს მრავალფეროვანი პროგრამა, რომლებმაც უფროსების აღფრთოვანება გამოიწვია. თბილისის საკვირაო სკოლაში თინეიჯერების კლუბის წევრებმა სოფია ოგანესიანმა და ლიზა სააკიანმა არაჩვეულებრივი პროგრამა წარმოადგინეს: კვერცხების ძებნა ეკლესიის ეზოში, რის შემდეგაც ჯგუფებად დაიყვნენ და სახალისო ვიქტორინა ჩაატარეს. უნდა აღინიშნოს, რომ გოგონებმა საკუთარ თავზე აიღეს ლიდერობა საბავშვო აქტივობების მომზადების და ჩატარების დროს. დიდი მადლობა, ლიზა და სოფია, ამ ინიციატივისა და სიხარულისთვის, რომელიც ბავშვებს მიანიჭეთ!
რუსთავის მშვიდობის ეკლესიის საკვირაო სკოლის ბავშვებმა პედაგოგების ანა აბშილავას და საშა შუბინის ხელმძღვანელობით შესანიშნავი სააღდგომო კონცერტი ჩაატარეს და კოსტუმირებული სცენებით, ლექსებითა და სიმღერებით, ასევე ფლეიტაზე ვირტუოზული შესრულებით მრევლის წევრებს დიდი სიამოვნება მიანიჭეს. თინეიჯერების ჯგუფის წარმომადგენელი ლიზა ნერგაძე პირველად წარსდგა სტუმრების წინ და მათ სააღდგომო ისტორიის გარშემო ქადაგება წაუკითხა. 
აღდგომის საღამოს ეპისკოპოსმა როლფ ბარაისმა თბილისის შერიგების ეკლესიაში პირველად ჩაატარა უჩვეულო ეკუმენური ღვთისმსახურება აგაპე, რომელშიც მონაწილეობდნენ ევანგელიურ-ბაპტისტური, რომის-კათოლიკური და ჩვენი ეკლესიის მრევლის წევრები თბილისიდან და რუსთავიდან და ასევე სტუმრები. ეკლესიის დარბაზში დადგმულ მაგიდასთან ლოცვისა და სიმღერების შემდეგ აგაპე-სუფრა გაეწყო აღდგომის წინა საღამოს იესოს და მისი მოწაფეების მსგავსად. 
ჩვენთვის, ადამიანებისთვის, სრულებით შეუძლებელია, ჩავწვდეთ ღმერთის, შემოქმედის უზარმაზარ, მარადიულ, ყოვლისმომცველ, უპირობო სიყვარულს. იესომ ამქვეყნად თავისი გზა განვლო, რათა ჩვენთვის სიყვარულის მაგალითი მოეცა! ვიცხოვროთ ერთმანეთის სიყვარულით და მშვიდობით და ვუწილადოთ ადამიანებს ღვთის სიყვარულის ნათელი!